Carles Puigdemont tikin úr embætissessinum

Í Katalonia er støðan ógreið og spent, eftir at spanska stjórnin fríggjakvøldið sendi landspartastjórnina til hús og skrivaði út val.

Fríggjakvøldið samtykti ein meiriluti í katalonska tinginum at loysa frá Spania við 70 atkvøðum fyri og 10 ímóti. 

Hetta fekk sponsku miðstjórnina at seta í verk grein 155 í sponsku grundlógini, sum gevur sponsku stjórnini heimildir til at taka sjálvstýri í Katalonia úr gildi og skriva út nýtt val. 

Grein 155 varð samtykt við stórum meiriluta í spanska senatinum ein tíma eftir, at katalanar høvdu lýst loysingina. 

Hetta merkir samstundis, at katalonski forsetin, Carles Puigdemont, er tikin úr embætissessinum.

Sambært bretska tíðindastovninum, BBC, fordømir Puigdemont avgerðina hjá sponsku stjórnini, og hann sigur seg ikki hava ætlanir um at gevast við arbeiðinum um at tryggja katalanskt sjálvstýrið. 

Tað er enn ógreitt, hvussu spanska stjórnin skal yvirtaka valdið. Ein talsmaður fyri sponsku stjórnina sigur, at Puigdemont kann stilla upp til valið, sum verður 21 december í ár.