Óvissa um vinningur frá Bitcoins skal skattast

Mong eru tey, ið eru vorðin millióningar av nýggja talgilda gjaldoyranum bitcoins, hvørs virði er fleirfaldað seinasta árið.

Men ert tú skrásettur í Føroyum, og ætlar at selja bitcoins við vinningi, so er óvist, hvussu nógv ríkari tú ert vorðin.

Tað er nevniliga ógreitt, um tú skalt rinda skatt av vinninginum.

 - Taks hevur ikki tikið støðu til spurningin, og tí ikki tikið støðu til, hvørt vinningur av sonevndum krypto-gjaldoyrum skal skattast ella ei, sigur Eyðun Mørkøre, stjóri í Taks.

Danir ivast eisini

Stjórin í Taks er ikki hin einasti, ið er í villareiðri, hvussu skattalógin fyriheldur seg til nýggja fyribrigdið við talgildum gjaldoyrum.

Donsku starvsfelagarnir í Skat hava latið vinning frá krypto-gjaldoyrum fáa frið, eftir at danska Skattaráðið í mars í 2014 staðfesti, at Bitcoins ikki skulu skattast.

 - Um tú staðfestir ein vinning frá tínum bitcoins, er hann skattafríur. Eins og um tú selir ein málning, og vinnur pening, so er tað skattafrítt, segði Hanne Søgaard Hansen, forkvinna í danska Skattaráðnum tá við ritzau.

Men økta keypið og sølan bitcoins - og ikki minst fleirfaldaða virðisøkingin á gjaldoyranum - hevur elvt til, at Skattaráðið fyrr í mánaðinum valdi at viðgera spurningin av nýggjum.

Aðrastaðni - eitt nú í Noregi og í USA - hava skattamyndugleikarnir hinvegin allatíðina tvíhildið um, at vinningurin skal skattast.

Hoyr eisini: Peningastovnar ivasamir um flytingar frá Bitcoins

Sí eisini: Nýtt gjaldoyra komið til Føroya

Les eisini: Bitcoin fyri býttlingar