Pedagogfelagið fer á ferð kring oyggjarnar

Hóast nýtt felag er stovnað fyri hjálparfólk, Hjálparfólkafelagið, hevur Føroya Pedagogfelag ikki mist ein einasta lim enn

Føroya Pedagogfelag hevði fund fyri limum sínum í Østrøm í Havn í gjár. Formaðurin í Føroya Pedagogfelag sigur, at fleiri av hjálparfólkunum, sum eru limir Pedagogfelagnum, fingu svar upp á síni ivamál. Føroya Pedagogfelag arbeiðir eisini fyri teirra áhugamálum, sigur hann.

Hinvegin sigur Maybritt Jacobsen, forkvinna í nýstovnaða Hjálparfólkafelagnum, at einki nýtt kom undan kavi. Tí var tað, sambært henni, rætt at stovna nýggja felagið, sum arbeiðir fyri hjálparfólkunum - og bara teimum.

Í næstu viku fer Pedagogfelagið á vitjan í Suðuroy. Seinni er ætlanin at fara í Sandoynna, í Vágar og í Norðoyggjar.