Aleqa sleppur í Inatsisartut

Fyrrverandi landsstýriskvinnan og núverandi fólkatingslimurin, Aleqa Hammond, fer at sita í grønlendska landstingunum, Inatsisartut.

Tað skrivar grønlendska kringvarpið á heimasíðu síni.

Á valinum, sum var í apríl mánaði, fekk Aleqa Hammond bara 171 persónligar atkvøður, og tað var ikki nóg mikið til at sleppa inn í tingið í fyrstu atløgu.

Men í gjárkvøldið varð greitt, at Vittus Qujaukitsoq ætlar sær í farloyvi, sum er vanligt at gera, um mann blívur ráðharri.

Hann fekk 698 persónligar atkvøður og er formaður í flokkinum Nunatta Qitornai, meðan Aleqa Hammond er nummar tvey á listanum fyri sama flokk.

Síðani summarið 2015 hevur Aleqa Hammond sitið á Fólkatingi, men bleiv koyrd frá, eftir at tað kom fram, at hon hevði misbrúkt eitt gjaldskort frá Fólkatinginum. Síðani hevur hon verið uttanflokkatingkvinna, inn til hon herfyri kom í flokkin Nunatta Qitornai.