Vinnan tekur undir við einskiljing

Tíðin er búgvin at selja Posta, tí almenni stovnurin kappast meira og meira við privat feløg, siga arbeiðsgevararnir.

Arbeiðsgevarafelagið heldur tó, at tað kundi verið gjørt eitt sindur greiðari, at skyldan hjá keyparanum at reka postflutning bara er galdandi í tíggju ár. 

Eftir tíggju ár er keyparin leysur av øllum skyldum hesum viðvíkjandi.

Tað má vera púra greitt, heldur Arbeiðsgevarafelagið, at keypari ikki verður álagdur nakrar serligar skyldur eftir postvirksemislógini, tá tey tíggju árini eru farin.

Heldur eigur eitt møguligt politiskt ynski um skyldu til ávíst postvirksemi at verða boðið út, so øll á post- og flutningsmarknaðinum eru undir somu treytum.