Atgongustig kunngjørd í kvøld

Klokkan 23.01 í kvøld føroyska tíð kunnu tey, sum hava søkt inn á útbúgvingar í Danmark síggja, hvønn karakter krevst fyri at sleppa inn á ymsu útbúgvingarnar í Danmark. 

Sostatt kanst tú eisini síggja, um tú ert komin inn á ta útbúgving, sum tú hevur søkt inn á. 

Sjálvt um karakterkrøvini verða almannakunngjørd klokkan 23, so merkir hetta ikki, at tú longu fær svar tá. Tað er nevniliga ymiskt frá útbúgvingarstovni til útbúgvingarstovn, nær úrslitini eru klár. 

Tí tað eru nevniliga útbúgvingarstovnarnir sjálvir, ið boða frá, um viðkomandi, sum hevur søkt, er sloppin inn. 

Tað eru tó bert tey, sum hava søkt inn á kvotu 1, sum fáa svar í kvøld - um tey eru sloppin inn ella um miðalkarakterurin akkurát ikki rakk. 

Tey, sum hava søkt inn á kvotu 2, mugu harafturímóti bíða. 

Um tú ikki sleppur inn, kann tó vera at vón er fyri framman. Tað er soleiðis, at tú kanst fáa eitt sonevnt standby-pláss. Tað vil siga, at um onkur meldar avboð kanst tú fáa tað plássið.