Landið seldi bygningar fyri 6,7 milliónir í fjør

Talan er um Kommandørhúsini í Havn, sum fóru fyri 4,4 milliónir, og um ognina á Klaksvíksvegi 60, sum varð seld fyri 2,2 milliónir. 

Tað sæst í frágreiðingini hjá Landsgrannskoðanini um játtanir og frávik frá teimum í fíggjarlógini fyri 2017.

Í 2018 eru settar av 30 milliónir krónur frá fastognasølu, og tað er eisini alt ov høgt mett, sigur landsstýrismaðurin í samferðslumálum.

Leysliga mett selur landið bygningar fyri 12 til 14 milliónir krónur í ár.

Higartil í ár eru seldir tveir bygningar hjá Tekniska skúla í Havn fyri 9,1 milliónir. Ein bygningur hjá skúlanum er enn í sølulista.

Løgtingsgrannskoðararnir hava áður gjørt landsstýrinum vart við, at játtanin í fíggjarlógini, sum eitur almennir bygningar, søla, eigur at vera veruleikakend. 
 
Landið eigur 185 bygningar, sum tilsamans eru 250.000 fermetrar.