Nýggjar reglur fyri nýggj grótbrót

Umhvørvisstovan hevur boðað Landsverki, kommunum og teimum stóru byggifyritøkunum frá, at nýggjar reglur eru galdandi fyri nýggj grótbrot, nýggjar útfyllingar og tunlar

Hon fer at viðgera plastið frá spreingiløðingnum í hvørjum einstøkum føri.

Útfyllingar hjá Eysturoyartunlinum á Skálafjørðinum hava fingið serstakt ískoyti til umhvørvisgóðkenningina hjá felagnum, sum ger tunnilin.

Útfyllingarnar í Runavík og á Toftum hava fingið serstaka umhvørvisgóðkenning, har serligur dentur verður lagdur á at avmarka plastdálkingina.

Tað sigur landsstýriskvinnan í unhvørvismálum, Sirið Stenberg, í svari til Bjørt Samuelsen, løgtingskvinnu.

Sirið Stenberg sigur eisini, at sera trupult er at forða fyri, at plastið frá spreingingunum á Glyvursnesi spjaðir seg.

Í grótbrotinum á Glyvursnesi, haðani grótið til havnarútbyggingina í Havn kemur, verður sprongt soleiðis, at plastleidningurin í  mestan møguligan mun verður hildin aftur, so leidningurin ikki fer á sjógv saman við grótinum, svarar Sirið Stenberg.

Hon sigur eisini, at hon hevur biðið Umhvørvisstovuna gera eitt uppskot um, hvussu vit fáa sett plastdálkingina á dagsskránna í Føroyum.