Fíggjareftirlitið góðkendi ikki nýggja stjóran

Ætlanin var annars, at Jacob Aarup-Andersen skuldi gerast nýggjur stjóri, men nú upplýsir Danske Bank í tíðindaskrivi, at Fíggjareftirlitið noktar at góðkenna hann. Orsøkin er, at hann hevur ov lítlar royndir.

- Fíggjareftirlitið hevur fyribils mett, at tey halda hann vera væl skikkaðan á nógvum økjum, men meta at tørvur er á longri royndum, m.a. á nøkrum av handilsøkjunum hjá Danske Bank, skrivar bankin í tíðindaskrivinum.

Nevndarformaðurin, Ole Andersen, sigur, at nevndin tekur støðuna hjá Fíggjareftirlitinum til eftirtektar. 

Nevndin er í samráðingum við aðrar møguligar umsøkjarar til starvið og fer at halda fram at leita eftir tí best skikkaða til starvið, sigur Ole Andersen.

Danske Bank skal hava nýggjan stjóra, eftir at Thomas Borgen herfyri legði frá sær eftir gøluna um peningahvíttan.