18,7 milliónir eykajáttan til Glasir

Landsstýriskvinnan í mentamálum biður Løgtingið um fleiri pengar til nýggja skúladepilin í Marknagili í Havn.

Tilsamans mangla 18,7 milliónir krónur í til at gjalda rokningar, nú bygningurin er um at vera liðugur.

Tað váttar Poul Geert Hansen, aðalstjóri í Mentamálaráðnum, sum eigur skúladepilin.

Rigmor Dam, landsstýriskvinna, er kunnað um málið, og hon er farin í Løgtingið við eini umbøn um fleiri pengar.

Umbønin um eykajáttanin er ikki løgd fram enn, men tað verður hon sum skilst seinni í dag.

Sambært Poul Geert Hansen hevur málið skund, tí vandi er fyri, at arbeiðið at gera skúladepilin lidnan, steðgar upp.

Hóast skúlin varð tikin í nýtslu eftir summarfrítíðina, so er framvegis arbeiði eftir at gera. 

Ewald Kjølbro, stjóri á Landsverki, sum er byggiharri, hevur í løtuni onga viðmerking til málið.

Ewald Kjølbro kunnar ídag politisku skipanina um støðuna á Glasir.