Er annað húsarhaldið uttanlands fæst eingin stuðul

Uppskotið hjá landsstýrinum um at strika stuðulin til húsarhald uttanlands hevur undirtøku hjá meirilutanum í Fíggjarnevndini.

Endamálið við lógini um stuðul til dupult húsarhald er, at tað skal bera til hjá fólki í Føroyum at búgva og arbeiða í Føroyum.

Meirilutin tekur tí undir við, at kravið um stuðul til dupult húsarhald verður, at bæði húsarhaldini eru í Føroyum. 

Er annað húsarhaldið uttanlands, verður eingin stuðul latin, eins og Kristina Háfoss, landsstýriskvinna í fíggjarmálum, mælir til, heldur meirilutin í Fíggjarnevndini.

Meirilutin sigur eisini, at fólk, sum arbeiða uttanlands, hava ymiskar skattafyrimunir. 

Minnilutin í Fíggjarnevndini skilir ikki, hví samgongan vil gera tað truplari hjá føroyingum, sum búgva í Føroyum, at arbeiða uttanlands, og mælir tí løgtinginum til at fella uppskotið.