Skal skráseta hví løn er goldin í arbeiðsstegði

Fíggjarmálaráðið eigur at skriva niður, hvørji atlit tala fyri at gera undantak frá høvuðsregluni um at halda løn aftur, tá arbeiðssteðgur er.

Talan kann vera um millum annað arbeiðsbyrðu hjá lønarfyrisitingini og um nakar tapsvandi er.  

Tað sigur Landsstýrismálanevndin hjá løgtinginum, sum loksins hevur avgreitt eina kæru, sum skjótt er níggju mánaðir gomul.

Nevndin sigur, at eingin lóg er brotin. 

Bill Justinussen, løgtingsmaður, kærdi fyrst í mars Kristinu Háfoss, landsstýriskvinnu, fyri at brúka almennar pengar í heimildarloysi.

Lógarbrot og eingin heimild

Bill Justinussen sigur, at Kristina Háfoss uttan heimild og móti galdandi reglum hevur goldið limum í Pedagogfelagnum løn, meðan arbeiðssteðgur var. 

Løgtingsmaðurin sigur, at landsstýriskvinnan hevur brotið stýriskipanarlógina, tí hon hevur brúkt pengar hjá landinum uttan heimild í fíggjarlógini ella í aðrari játtanarlóg.

Men grannskoðararnir hjá landinum, Landsgrannskoðanin og løgtingsgrannskoðarnir, halda ikki, at Fíggjarmálaráðið breyt nakra lóg, tá tað rindaði námsfrøðingum løn, meðan arbeiðssteðgur var.

Men Fíggjarmálaráðið átti at skjalfest tey viðurskifti, sum hava týdning fyri, hví ráðið valdi loysnina at mótrokna seinni heldur enn at steðga lønini.

Tað siga løgtingsgrannskoðarnir í svari til Landsstýrismálanevndina.

Og nevndin tekur undir við grannskoðarum landsins og ger ikki meira við málið.