Samtykt: Hoyvíkssáttmálin sigast upp

Løgtingið samtykti í nátt, at Hoyvíkssáttmálin kann sigast upp fyrsta januar næsta árat fara úr gildi fyrsta januar í 2020.

Uppskotið varð samtykt við atkvøðugreiðsluni 18 fyri og fýra ímóti.

At Hoyvíkssáttmálin verður uppsagdur er ein avleiðing av lógini um sjófeingi, ið millum annað ásetir, at útlendingar ikki kunnu eiga í føroysku fiskivinnuni á sjónum. 

Avmarkingar á ognarskapin hjá íslendingum í føroysku fiskivinnuni er brot á ásetingum í Hoyvíkssáttmálanum, og tí hevur landsstýrið arbeitt við at broyta tær ásetingarnar í Hoyvíkssáttmálanum, tó higartil uttan úrslit.

Landsstýrismaðurin í uttanríkis- og vinnumálum hevur biðið um loyvi at siga Hoyvíkssáttmálan upp fyrsta januar, tí uppsagnartíðin á sáttmálanum er eitt ár, og eftir tað er ein skiftistíð á fimm ár, har íslendskir íleggjarar í fiskivinnuni kunnu fara úr føroysku fiskivinnuni. 

Tað vil siga, at fyrsta januar í 2025 skulu viðurskiftini verða avgreidd, sum lógin um sjófeingi ásetur.

Føroyska landsstýrið fer at royna at fáa ein nýggjan sáttmála við íslendsku stjórnina, ið skal avloysa Hoyvíkssáttmálan, men higartil hevur tað ikki borið á mál.