Regiónsráðini verða avtikin

Tey fimm regiónsráðini í Danmark verða nú tikin av. Tað veit danska kringvarpið at siga.

Lars Løkke Rasmussen, forsætisráðharri, fer í dag at kunngera eina nýggja heilsunýskipan, og hon ber í sær, at regiónsráðini verða tikin av.

Regiónirnar verða kortini varðveittar sum ein umsitingarlig eind, men skipanin at velja fólk beinleiðis í regiónsráðini verður tikin av.

Í løtuni manna 205 politikarar regiónsráðini.

Stjórnin ætlar í staðin at skipa 21 heilsufelagsskapir, sum skulu tryggja eitt tættari samband við tey, sum hava brúk fyri sjúkraviðgerð.