Opinleikin má ikki skerjast

Felagið Føroysk Miðlafólk hevði farna vikuskiftið aðalfund.

Á fundinum blivu umrødd tvey aktuell mál, ið skerja opinleikan í almennu fyrisitingina, skrivar felagið í tíðindaskrivi.

Annað dømi er ætlanin hjá Fiskimálaráðnum at skerja lógina um alment innlit, tá talan er um lógina um sjófeingi, ítøkiliga í sambandi við menningarkvoturnar. 

- Tað má vera ein sjálvfylgja, at borgarar og miðlar fáa fult innlit í, hvussu ogn Føroya fólks verður umsitin og útlutað, skrivar felagið. 

Hitt aktuella dømi, sum felagið nevnir, er, hvussu formansskapurin í løgtinginum hevur tikið aftur møguleikan at fáa innlit í, hvussu løgtingslimir brúka tær 30.000 krónurnar, sum tey á hvørjum ári fáa til førleikamenning.

Føroysk Miðlafólk heita í hesum sambandi á Føroya Løgting um at virða opinleikan og verja fólkaræðið, so borgarar hava fullgóðan møguleika at hava eftirlit við, hvussu skattaborgarans peningur verður brúktur og landsins virði umsitin, skrivar felagið í fráboðan.