USA er í HM finaluni

Fyri triðju fer á rað hevur USA spælt seg í HM finaluna í fótbólti.

Í gjárkvøldi møttu tær Onglandi í hálvfinaluni. USA vann 2-1, sum eisini var hálvleiksstøðan.

55.000 áskoðarar í Lyon sóu Christen Press leggja USA á odda við skallara, tá tíggju minuttir vóru farnir av dystinum.

Ongland svaraði aftur, tá tjúgu minuttir vóru farnir við máli frá Ellen White.

USA helt tó áfram við sínum álopssinnaða spæli, og tað eydnaðist eisini at skora áðrenn steðgin. 

Alex Morgan, sum er toppskjútti í HM-kappingini, skoraði sítt sætta mál, sum eisini tók USA í finaluna.

Ongland var tó ógvuliga nær við at javna til 2-2, tí tá tíggju minuttir vóru eftir misnýtti liðskiparin, Stephanie Houghton, brotsspark.

USA ofta millum tey bestu

Tað er als ikki óvanligt, at USA ger seg galdandi í HM-endaspælinum

Tær hava vunnið kappingina tríggjar ferðir (1991,1999 og 2015) og fýra ferðir hava tær vunnið antin silvur ella bronsu (1995,2003,2007 og 2011).

HM í kvinnufótbólti varð fyrstu fer spælt í 1991. Einki annað land hevur vunnið so ofta sum USA.

Í kvøld spæla Holland og Svøríki í hinari hálvfinaluni. Dysturin byrjar klokkan 20.00 og verður vístur beinleiðis á DR3.

Finalan verður spæld sunnudagin í Lyon.