Sonni Ragnar hevur útlendsk tilboð

Fótbóltslandsliðsleikarin, Sonni Ragnar Nattestad, gevst í FC Frederica.

Landsliðsleikarin og danska fyrstudeildarfelagið skrivaðu undir sáttmála í januar í ár, men hesin sáttmálin er nú ógildaður, boðar FC Fredericia frá.

Við heimasíðu felagsins sigur stjórin Stig Pedersen, at tey ynskja Sonna Ragnari alt tað besta, og at hann fær tað besta burtur úr sínum evnum aðrastaðni.

Fredericia Dagblad skrivar, at tað var høvuðsvenjarin, Jonas Dal, sum strongdi á at fáa føroyingin til felagið í vetur. Men Jonas Dal ásannar nú, at tað kom óvart á hann, at Sonni Ragnar var so nógv plágaður av skaðum. Jonas Dal hevði roknað við, at Sonni Ragnar fór at gerast birgur aftur innan fyri eitt hálvt ár, men so var ikki.

Sonni Ragnar Nattestad sigur við Kringvarpið í dag, at hann hevur nøkur tilboð frá feløgum uttanfyri Føroyar, sum hann hyggur nærri at í løtuni. Hann roknar við, at hetta er komið upp á pláss innanfyri næstu vikurnar.

Sonni Ragnar Nattestad spældi átta dystir fyri Fredericia í næstbestu donsku deildini og gjørdi eitt mál.