Árni og Páll gjørdu tað aftur fyri KÍ í Evropa

Árni Frederiksberg og Páll Klettskarð syrgdu enn einaferð fyri, at KÍ spældi seg víðari í Evropa.

Teir báðir metmenninir skutu hvør sítt mál í 2-1 útisigrinum á Atert Bissen, og so vunnu klaksvíkingar 4-2 tilsamans og fáa litaviska mótstøðu í 2. umfarið í Champions League.

Teir hava nú skotið 15 evropeisk mál í part og eiga sín stóra part í góðu evropeisku avrikunum hjá KÍ seinastu árini. 

Árni lumpaði málverjan

KÍ, sum vann 2-1 í Føroyum í síðstu viku, fekk frálíka byrjan í Luksemburg. Níggju minuttir vóru spældir, tá Árni Frederiksberg fekk bóltin í høgru síðu og sendi hann í netið, tá málverjin bíðaði eftir innlegginum.

Roman Ferber javnaði miðskeiðis í fyrra hálvleiki, men eftir steðgin avgjørdi Páll Klettskarð dystin, tá hann skallaði eitt horna frá - ja, tú hevur gitt tað - Árna Frederiksberg í málið.

Í 2. umfari bíðar litaviska meistaraliðið Kauno Zalgiris. Heimadysturin verður 21. ella 22. juli og útidysturin verður á ólavsøku.