Giktalæknin heldur fram á Landssjúkrahúsinum

<p>Giktalæknin Pero Sore heldur fram í starvi sínum á Landssjúkrahúsinum. Pero Sore hevði annars sagt seg úr starvi 1. apríl, tí hann var ónøgdur við arbeiðsumstøðurnar á Landssjúkrahúsinum.</p>

<p>Fyrradagin fekk landsstýrismaðurin í heilsumálum fleiri enn 700 undirskriftir frá starvsfólkum á Landssjúkrahúsinum og øðrum borgarum, sum vildu hava eina skjóta loysn á málinum. Tað lovaði Karsten Hansen.</p>

<p>Í dag undirskrivaðu partarnir so undir eina avtalu, ið hevur við sær, at Pero Sore fyribils heldur fram at veita giktasjúkum føroyingum sínar tænastur. Talan er tó bara um eina fyribilsavtalu, ið ásetir, at Pero Sore heldur fram at veita serlæknatænastu innan rheumatologi.</p>

<p>Fyribilsavtalan fevnir um veitingar og takstir fyri privat-starvandi serlæknar í giktasjúkum. Í avtaluni verður lagt upp fyri, at hon er bara fyribils, og takstirnir skulu ikki leggja støði fyri sáttmálasamráðingarnar, sum verða í næstum.</p>