- Tíðindi, mentan og ítróttur
Allur makrelur missir MSC-góðkenning
<div>Allur makrelur í Norðuratlantshavi missir nú sína MSC-góðkenning.</div><div><br></div><div>Felagsskapurin Marine Stewardship Council, ið stendur fyri góðkenningini, boðar frá avgerðini. Hon er grundað á úrslitaleysu makrelsamráðingarnar millum ES, Norra, Ísland og Føroyar, ið elvir til, at londini aftur í ár fara at fiska nógv meira, enn fiskifrøðin mælir til.</div><div><br></div><div>Avgerðing hjá MSC merkir, at allur makrelur, fiskaður í Norðuratlantshavi og landaður í Evropa eftir 31. mars, missir sína góðkenning. Roknað verður við, at avgerðin fer at raka umleið 1400 vørur, ið verða seldar við MSC-góðkenning, fyrst og fremst í Vesturevropa. </div><div><br></div><div><b>Skotar harmast</b></div><div><br></div><div>Skotski fiskimálaráðharrin, Richard Lochhead, harmast um avgerðina. </div><div><br></div><div>- At MSC-góðkenningin verður tikin aftur, er sera ørkymlandi. Tað átti at verið áhugi hjá øllum, at makrelstovnurin verður fiskaður burðardygt, og fær góðkenning av altjóða stovnum sum MSC, sigur Lochhead við bretska blaðið The Guardian.</div><div><br></div><div>Skotski fiskimálaráðharrin sipar til føroysku og íslendsku myndugleikarnar, sum hava ásett sær stórar eginkvotur av makreli. </div><div><br></div><div><b>Bretar ov grammir</b></div><div><br></div><div>Andras Kristiansen, føroyskur samráðingarleiðari undir makrelsamráðingunum, sigur við blaðið, at ES og harvið eisini Bretland hava verið alt ov gromm at áseta sær egnar kvotur, sum eru heili 95 prosent av tilmælinum hjá ICES.</div><div><br></div><div>- Um londini nú ikki kunnu varðveita sínar MSC-góðkenningar, er tað teirra borð, sigur Andras Kristiansen við The Guardian.</div><div><br></div><div>Marine Stewardship Council, MSC, tekur ikki dagar ímillum, hvørji lond fiska burðardygt, og hvørji ikki fiska burðardygt. Felagsskapurin hyggur bara eftir, um sjálvur fiskastovnurin verður fiskaður burðardygt. </div><div><br></div><div>Makrelur frá føroyskum skipum hevur ikki góðkenning frá MSC, og tí fær afturtøkan av MSC-góðkenning á makrel úr Norðuratlantshavi ikki beinleiðis ávirkan á føroysku vinnuna.</div><div><br></div><div>Hinvegin verður stigið mett at ávirka uppsjóvarvinnuna í Onglandi, Skotlandi, Írlandi, Danmark, Norra, Svøríki og Hollandi, sum frá næstu viku at rokna ikki kann fiska og selja makrel við MSC-góðkenning.</div><div><br></div><div><br></div>
