Nógv lomb eru komin

Í haganum Norðuri í Haga, sum er Millum Fjarða í Eysturoynni, letur Líggjas Húsgarð, bóndi, væl at lembingini.

Hagin hoyrir til Gøtu og er tíggju merkur. Tað eru 260 áseyðir í haganum, og nógv er at gera hesa tíðina á árinum.

Fýrlemba á Viðareiði

Flestu ær lemba eitt lamb, men óvanligt er ikki um ær kemur við tveimum.

Á Viðareiði er tað óvanliga hent, at ein ær hevur lembt fýra lomb.

Tað er 91 ára gamli Markus Sørensen, sum eigur ærina, sum fekk fýra lomb. 

Bæði í fjør og í fyrrárið var hon trílemba.

Tað eina lambið er síðani deytt og eitt er tikið burturfrá og er nú heimalamb.

Veðrið ávirkar

- Veðrið ávirkar nógv gongdina í haganum, sigur Líggjas Húsgarð.

Men í 2015 mundi gingið heilt galið, tá ið tað kavaði sera illa. 

Men bóndin fekk bjargað nógvum lombum. 

- Nú gongur væl, og vit gloyma, at tað gekk illa, sigur Líggjas Húsgarð.