Professari: Sildatrætan álvarsmál fyri ríkisfelagsskapin

Stríðið millum Danmark, Føroyar og ES um sildina er nú eisini á breddanum í donskum fjølmiðlum. "Norðurlendskt tríkantsklandur" er heiti á forsíðugrein í Weekendavisen hesa vikuna. Heini í Skorini, stjórnmálafrøðingur hevur skrivað greinina.

ES og Danmark í øðini

ES og Danmark eru í øðini um, at Føroyar hava trífaldað sína sildakvotu, og nú ES hóttir við at seta handilsforðingar í verk móti Føroyum frá 1. august, kann Danmark enda í eini sera torførari tvístøðu um, hvat hevur størst týdning: ES ella ríkisfelagsskapurin. 

Í ringasta føri kann tað henda, at føroyskir trolarar fyri fyrstu ferð í søguni hjá ríkisfelagsskapinum ikki sleppa at leggja at í donskum havnum, eitt nú Esbjerg, Hirtshals og Hanstholm. Og júst í hesum býunum hava føroysk skip havt stóran fíggjarligan týdning.

Álvarsmál fyri ríkisfelagsskapin

Í greinini verður róð framundir, at stríðið snýr seg um annað og meiri enn sildina.

- Hetta er eitt álvarsmál fyri ríkisfelagsskapin, heldur Uffe Østergård, professari í stjórnmálafrøði á Copenhagen Business School. Hann sigur, at tríðið vísir betur enn nakrantíð, at tað ikki er hald í at síggja Danmark sum ein eindarstat undir grundlógini. 

Í hesum stríðnum sita partarnir hvør sínumegin samráðingarborðið, vísir Uffe Østergård á. Professarin minnist einki annað mál, har mótsagnirnar í ríkisfelagsskapinum hava verið sjónligari, skrivar Heini í Skorini í greinini í Weekendavisen.