- Tíðindi, mentan og ítróttur
Tokførari avhoyrdur í dag
![](https://kvf.fo/sites/default/files/styles/grein-ovasta-mynd/public/tokforarim_jose_garzon.jpg?itok=w5FPM4qy)
Tokvanlukkan hevur higartil kravt 80 mannalív, og umleið 140 vórðu løstað.
52 ára gamli tokførarin, Fransisco José Garzón, er innlagdur á sjúkrahúsi, men er varðhaldsfongslaður kortini. Roknað verður við, at hann verður avhoyrdur í dag.
Illgruni er um, at tokið koyrdi nógv skjótari enn loyvt var. Mest loyvda ferð á staðnum var 80 kilometrar um tíman, men beint eftir vanlukkuna viðgekk tokførarin, at hann koyrdi mangt slíkt.
-Tokið kom inn í svingið við eini ferð á í minsta lagi 190 kilometrar um tíman. Eg vóni ikki, at nakar er deyður. Tað fer at vera á míni samvitsku, segði tokførarin í eini samrøðu, sum varð tikin upp beint eftir vanlukkuna.
Tokið koyrdi av sporinum í einum svingi stutt áðrenn tað skuldi steðga við eina tokstøð í Santiago de Compostela.
Landasorg er lýst í Spania í tríggjar dagar eftir vanlukkuna.