John Kerry: Friðarsamráðingar í Miðeystri

Amerikanski uttanríkisráðharrin John Kerry hevur biðið ísraelska forsætis-ráðharran og palestinska forssetan at senda samráðingarfólk til Washington

John Kerry, uttanríkisráðharri, saman við komandi oddamanni í friðartingingunum millum Ísrael og palestinar, Martin Indyk, fyrrverandi amerikanskur sendiharri í Ísrael.

Bogi Godtfred

Grækaris Djurhuus Magnussen

30.07.2013 - 16:19

Endamálið er at fáa gongd á aftur friðar-samráðingarnar í Miðeystri.

Fleiri ferðir í Miðeystri
John Kerry hevur seinastu mánaðirnar verið fleiri ferðir í Miðeystri fyri at fáa ísraelsku og palestinsku stjórnirnar aftur til samráðingar-borðið og nú hevur hann so sent boð eftir teimum stjórnar-umboðum, sum standa á oda fyri samráðingunum.

Tað eru trý ár síðani beinleiðis samráðingar seinast vóru partanna millum. Báðir partar koma við høgtstandandi umboðum, sum skulu royna at gera arbeiðsætlan fyri, hvussu samráðast skal, verður sagt.

Seks-dagakríggið
Palestinar halda fast um, at ongar formligar samráðingar kunnu byrja fyrr enn greitt er, um tær taka støði í at mørkini eru tey, sum vóru, áðrenn seks-dagakríggið í 1967, tá ísraelski herurin tók vestara áarbakka og jordanska partin av Jerusalem, ið palestinar ætla skal vera teirra høvuðsstaður.

Ísraelsku megin eru fleiri flokkar í stjórnini ímóti samráðingum, sum kunnu hava við sær, at Ísrael má geva frá sær land, ikki minst tað, sum hevur átrúnaðarligan og søguligan týdning.