Janus Rein farin upp í Fólkaflokkin

Janus Rein, uttanflokkatingmaður, er í dag farin upp í Fólkaflokkin og er nú partur av tingmanningini hjá Fólkaflokkinum.

Fólkaflokkurin sigur í tíðindaskrivi, at hann fegnast um, at Janus Rein er komin upp i flokkin. Bjarni Djurholm sigur soleiðis í tíðindaskrivinum:

 "Janus hevur farnu tvey árini prógvað, at hann er ein dugnaligur og nærlagdur politikari. Ein maður, sum í verki hevur víst, at hann er ein fongur fyri parlamentarisku skipanina. Politikari, sum miðvíst virkar fyri haldgóðum loysnum.

Í vinnunevndini

Janus hevur í hesum valskeiðinum, saman við undirritaða, m.a. verið limur í løgtingsins vinnunevnd. Eg eri vísur í, at allir vinnunevndarlimirnir kunnu vátta, at Janus áhaldandi í nevndararbeiðinum hevur virkað fyri góðum og konstruktivum úrslitum.

 Umframt sítt politiska positiva virkni, so er Janus við sínum dyggu útbúgvingum sum skipsførari, flogskipari, løgfrøðingur o.a., eitt gott aktiv fyri Fólkaflokkin og politisku skipanina í síni heild," sigur Bjarni Djurholm í tíðindaskrivinum.

Nú Janus Rein er farin upp í Fólkaflokkin, er Fólkaflokkurin vorðin størstur flokkur á tingi. Hann hevur nú níggju tingsessir.

Valdur fyri Framsókn 

Janus Rein kom sjálvur annar á ting fyri Framsókn, sum fyrstu ferð stillaði upp til løgtingsvalið í 19. oktober í 2011. Hann fekk 250 atkvøður. Hin var floksformaðurin, Poul Michelsen.

Men í oktober í fjør tók Janus Rein seg úr Framsókn, og hevur verið uttanflokka á tingi síðani.