Eldradagur í Havn

Altjóða eldradagur verður hildin í Havn í dag.

Byrjað verður kl 10 í morgun í Gongugøtuni í Havn, har Heðin Mortensen, borgarstjóri, setur dagin.

Skráin fyri dagin er rúgvismikil.

Trygvi F. Guttesen, verkfrøðingur og eykalimur í eldraráðnum, fer at hugleiða um triðja aldurin.

Heini Olsen, verkfrøðingur, fer at greiða frá um Brúnna um Streymin, sum hann sjálvur var við til at byggja.

Og Karin Kjølbro fer at hugleiða um evnið: Ung eygu og minni.

Tónleikaframførslur verða eisini á skránni: Beinta Háberg Jacobsen fer at spæla klaver, harmonikutónleikur verður og Maria í Ullvøruhúsinum fer at syngja.

Bønarhald og tónleikur verður í Dómkirkjuni, og felagssangur í Posthúskjallaranum.

Tað er eldraráðið í Tórshavnar Kommunu sum skipar fyri degnum.

Endamálið hjá ráðnum er at ráðgeva býráðnum í viðurskiftum, sum hava ávirkan á eldru borgararnar.