Løgmaður gjørt nýtt uppskot um Skálafjarðartunnilin

Løgmaður ætlar sær nú at kanna, hvussu stór vælvildin er í samgonguni at byggja ein Skálafjarðartunnil. Tað er endamálið við samgongufundinum, sum hann hevur boðað til klokkan hálvgum tvey í Tinganesi.

Kaj Leo Holm Johannesen sigur, at hann hevur eitt ítøkiligt uppskot um, hvussu samgongan kann fara víðari í tunnilsmálinum, og tað uppskotið fer hann at leggja fyri samgongulimirnar. Hvat stendur í uppskotinum, vil hann ikki avdúka enn.

Hann ætlar sær eisini at kanna, hvussu heilhjartaðir samgongulimir eru fyri at byggja Skálafjarðartunnilin.

Nógvar útmeldingar

- Útmeldingarnar í samgonguni eru, at nógv taka undir við at byggja Skálafjarðartunnilin. Eg ætli mær at vita, hvussu verulig hendan vælvildin er, ella um tað bara snýr seg um paradu-uppskot, sigur løgmaður.

Undir øllum umstøðum skulu kortini blandast av nýggjum á samgongufundinum í dag.

Spurningurin er so, um kortini í sjálvum landsstýrinum skulu blandast umaftur - um rumblið um sáttmálan við Copenhagen Infrastructure Partners og lógaruppskotið um Skálafjarðartunnilin skuluhava avleiðingar fyri Kára P. Højgaard, landsstýrismann. Avleiðingar á tann hátt, at hann verður loystur úr starvi.

Biðið um frágreiðing

Løgmaður bað í vikuni um eina frágreiðing frá landsstýrismanninum, eftir at Kringvarpið í síðstu viku avdúkaði nøkur skjøl, har embætisfólk í Innlendismálaráðnum settu stórt spurnartekn við fleiri viðurskifti í lógaruppskotinum um tunnilin.

Innlendismálaráðið svaraði sama dag, men løgmaður bað um eina meira gjølliga frágreiðing. Hendan er ikki komin enn.

Kaj Leo Holm Johannesen sigur, at hann tekur onga avgerð viðvíkjandi landsstýrismanninum fyrr enn hann hevur lisið ta frágreiðingina. Kári P Højgaard, landsstýrismaður, segði við Kringvarpið fyri løtu síðani, at frágreiðingin er á veg. Løgmaður fær hana væntandi í morgin, sigur hann.