Arva-strongurin skal ikki vera pengamaskina

Far-Gen verkætlanin hjá føroyska heilsuverkinum er nú aftur fyri atfinningum.

Tað er ein limur í Etiska Ráðnum í Danmark, sum hesaferð finst at ætlanini at skráseta arvastrongin hjá øllum føroyingum.

Føroyska Vísindasiðsemisnevndin hevur áður sýtt fyri at góðkenna verkætlanina.

Lotte Hvas heldur ikki, at gransking í føroyskum ílegum eigur at verða brúkt til at fáa pengar til landið ella til at menna arbeiðspláss.

- Neyðugt er at vera varin við at kanna allan arvastrongin hjá fólki, tá eingin illgruni er um arvaliga sjúku.

Tað kann væl vera, at granskarar kunnu brúka tað, men einstaka menniskjað kann ikki brúka tað til nakað.

Vit hava øll nógvar ílegur við breki á, sum vit liva fínt við.

Við at lesa allan arvastrongin er vandi fyri, at tú fært vitan, sum ikki ger tað klókari, men sum setur teg í eitt etiskt dilemma, sigur Lotte Hvas við blaðið Kristeligt dagblad, sum fríggjadagin hevði atfinningarnar á forsíðuni.