CIP einki fingið enn

Milliónin til CIP, Copenhagen Infrastructure Parteners, er ikki goldin enn. Og eingin avtala er gjørd um, nær gjaldast skal.

Tað sigur Kaj Leo Holm Johannesen, løgmaður, í svari til Gunnvør Balle, løgtingskvinnu.

Hon spurdi um milliónina, sum CIP skuldi hava, tí felagið ongan sáttmála fekk um Eysturoyartunnilon fyri 31.august.

Løgmaður sigur í svarinum, at 5.september sendi Rune Bro Róin í CIP teldupost til Rúna Joensen, táverandi aðalstjóra í Innlendismálaráðnum, har hann segði, at CIP er til reiðar at útseta gjaldsfreistina, til politiska viðgerðin av málinum er endað.

Sambært Fíggjarmálaráðnum er upphæddin ikki goldin enn, og eingin neyvari avtala er gjørd um, nær gjaldast skal, sigur løgmaður.

Í svari til Høgna Hoydal, løgtingsmann, sum eisini spurdi løgmann um milliónia, sigur Kaj Leo Holm Johannesen, at landsstýrið hevur skyldu til at gjalda, verður milliónin kravd.

Milliónin fæst bara aftur í landskassan, um eitt privat felag fær rættin at gera Eysturoyartunnilin, sigur løgmaður.

Høgni Hoydal spurdi eisini, hvørjar aðrar slíkar break fee avtalur, tað almenna í Føroyum hevur gjørt.

Í síni frágreiðing um tunnilsmálið sigur Sjúrður Rasmussen, løgfrøðingur á Løgmansskrivstovuni, at slík avtala er hvørki ólóglig ella óvanlig.

Løgmaður veit ikki um aðrar break fee avtalur í Føroyum, og hann fer heldur ikki at kanna aðrar slíkar avtalur, sigur hann í svarinum.