Orða arbeiðssetning hjá kanningarstjóra

Fyrrapartin fer Landsstýrismálanevndin at orða arbeiðssetningin hjá kanningarstjóranum, sum skal kanna lutin hjá Kára P. Højgaard, fyrrverandi landsstýrismanni, og Kaj Leo Holm Johannesen, løgmanni, í málinum um Eysturoyartunnilin.

Landsstýrismálanevndin biður síðani løgtingsformannin finna kanningarstjóran, sum skal vera ein óheftur løgfrøðingur.

Landsstýrismálanevndin avgjørdi sjálv at kanna Kára P. Højgaard, og Høgni Hoydal, løgtingsmaður, sendi nevndini kæru um løgmann.

Harafturat hevur nevndin fingið kæru frá einum borgara, sum kærir um, at innlit ikki fæst í málið um Eysturoyartunnilin.

Spurningurin, sum Landsstýrismálanevndin nú skal taka støðu til, er um ikki hendan kæran skal til Løgtingsins umboðsmann.

Men Løgtingsins umboðsmaður hevur boðað frá, at har verða kærur um vantandi innlit í sáttmálan um Eysturoyartunnilin ikki viðgjørdar fyrr enn løgtingið er liðugt at viðgera tunnilsmálið.

Løgtingsins Umboðsmaður hevur fingið fýra kærur um avgerðirnar hjá Innlendismálaráðnum og Løgmansskrivstovuni um at nokta at lata innlit í málið um sáttmálan, sum er gjørdur við Copenhagen Infrastructure Partners um Eysturoyartunnilin.

Øll tunnilsuppskotini eru framvegis í Rættarnevndini og Fíggjarnevndini.

Og har verður einki gjørt við tey, fyrr enn landsstýrið kemur við einari loysn á málinum um undirsjóvartunnil millum Eysturoynna og Streymoynna.