Nýtt slag av HIV-virus

Eitt meira ágangandi slag av HIV-virusini, sum elvir til sjúkuna AIDS, er funnin av granskarum í Svøríki.

Hetta skrivar NRK á heimasíðuni. Tað eru granskarar á lærda háskúlanum í Lund, sum hava gjørt kanningar í lítla afrikanska landinum Guinea-Bisseau, sum hava funnið fram til nýggja HIV-slagið.

Brýtur skjótari út

Nýggja HIV-slagið er ein blanding av tveimum av mest vanligu HIV-virusunum, 02AG og A3. Talan er um ein sonevndan rekombintant, ið ger, at AIDS brýtur skjótari út hjá fólki, sum verða smittað.

- Rekombinanturin tykist vera meira seiglívaður og ágangndi, enn tey bæði HIV-sløgini, hann er sprettur burturúr, sigur Angelica Palm, doktari við lærda háskúlan í Lund. Tað eru 30 ár síðan at HIV varð uppdagað.

Fyrstu árini var læknavísundin maktarleys í bardaganum móti virussini, sum elvir til AIDS, men í dag er viðgerð so mikið góð, at AIDS-sjúklingar kunnu liva leingi við sjúkuni.