Enoksen úr Siumut

Sermitsiaq skrivar, at Enoksen hevur serliga funnist harðliga at fiskivinnupolitikkinum hjá flokkinum. Hann harmast um, at Siumut hevur tikið kvotur frá teimum, sum hava stóran tørv á teimum.

Røddir í Siumut hava somuleiðis funnist at, at maðurin hjá Alequ Hammond, Tom Ostermann, fekk starvið sum persónligur ráðgevi hjá landsstýrismanninum í fiskivinnumálum Karl Lyberth í gjár. Fleiri hava sagt, at tað er nepotisma, og KNR skrivar, at tað er ein av meginørskunum til, at Enoksen er farin úr flokkinum.

Enoksen atkvøddi somuleiðis ímóti síni samgongu, tá lógin um nul-toleransu var sett úr gildi í oktober í fjør. Lógin ásetti, at tað er bannað at útvinna og útflyta geislavirkin steinsløg, sum eru í grønlendsku undirgrundini. Hann var einasti samgongulimur, sum atkvøddi ímóti uppskotinum tá.

Og nú vil Enoksen so ikki vera við longur.

Karl Lyberth, sum er næstformaður í Siumut, sigur við Sermitsiaq, at fráboðanin hjá Enoksen at taka seg úr flokkinum, kemur púra óvart á seg.

Hans Enoksen var landsstýrisformaður í Grønlandi í árunum frá 2002 til 2009. Hesi árini var hann eisini formaður í Siumut.

Enoksen umhugsar nú sína politisku støðu, um hann skal fara upp í annan flokk.