Rentukríggj kostar peningastovnunum

Rentukríggið millum peningastovnarnar er ikki gagnligt fyri samfelagið sum frá líður. Tað elvir til ótryggleika heldur enn javnvág og tryggleika.
Tað heldur Suðuroyar Sparikassi, sum hevur merkt sviðan av rentukrígnum, sum kom í kjalarvørrinum á fíggjarkreppuni.
Kreppan tykist vera hasað av, men so kom rentukríggið í staðin fyri.   
Inntøkurnar hjá Suðuroyar Sparikassa, minsta peningastovninum í Føroyum, vóru 41 prosent minni í fjør enn í 2012.
Høvuðsorsøkin er rentustríðið og serligar útreiðslur av tillagingum í starvsfólkakostnaðum í desember, sigur leiðslan í Sparikassanum.
Netto rentuinntøkan minkaði fimm prosent í fjør.  
Men kortini hevði Suðuroyar Sparikassi stóra framgongd í 2013. Yvirskotið fyri skatt var beint oman fyri tvær milliónir krónur, sum eru 767 prosent meira enn í 2012. 
Orsøkin er fyrst og fremst nógv minni niðurskrivingar í fjør. Solvensurin er 15,3 prosent. Hann hækkaði 0,4 prosentstig í fjør.
Suðuroyar Sparikassi hevur aðalfund 31.mars.