Eingin eftirmeting av útveiting

Hóast Vinnumálaráðið seinastu árini hevur veitt fleiri tænastur út til privat at reka, eru ongar eftirmetingar gjørdar av, hvussu hendan útveitingin hevur riggað. Í øllum førum fyriliggja ongar skrivligar eftirmetingar um útveitingina.

Landsstýrismaðurin í vinnumálum, Jóhan Dahl, boðaði herfyri frá, at hann fer at slóða fyri, at fleiri tænastur hjá Strandferðsluni skulu veitast út til privat at reka. Hann hevur lagt eitt uppskot fyri løgtingið, sum skulu gera tað møguligt at útveita Strandferðsluna. Hetta uppskotið liggur í løtuni í Vinnunevndini.

Tá ein tænasta verður útveitt, merkir tað, at tað almenna rindar privatum fyritøkum eina ávísa upphædd fyri at røkja eina ávísa uppgávu.

Onga hóming

Men Vinnumálaráðið hevur eftir øllum at døma onga hóming av, hvussu tað hevur lukkast at útveita tænastur higartil. Tí ongar eftirmetingar eru gjørdar, sum siga nakað um, hvørt tænasturnar eru vorðnar bíligari, betri og so framvegis.

Kringvarpið hevur spurt Vinnumálaráðið, hvørjar eftirmetingar eru gjørdar av royndunum, sum higartil eru gjørdar við útveiting og privatisering av tænastum innan samferðslu. Til dømis Farmaleiðir, Bygdaleiðir, Mykinesleiðin og tyrluflúgvingin til útoyggjar. Vit vildu vita, hvat eftirmetingarnar hava víst, og um tænasturnar eru vorðnar bíligari at reka.

Men í Vinnumálaráðnum hava tey ongar eftirmetingar av útveitingini. Í øllum førum er svarið upp á fyrispurningin, at "Vinnumálaráðið hevur onki skrivligt tilfar um eftirmetingar". Sostatt hevur løgtingið ongar eftirmetingar at stuðla seg til, tá tað í næstum skal taka støðu til, um tænasturnar hjá Strandferðsluni skulu útveitast.

Tað hevur ikki eydnast at fáa orðið á landsstýrismannin í Vinnumálum, Jóhan Dahl, í dag.