Havrannsóknarskipið helst aftur útsett

Nú bendir alt á, at bíðitíðin eftir nýggjum havrannsóknarskipi verður longd eina ferð afturat. Tí meirilutin í Vinnunevndini mælir til, at nýggjar tekningar og nýggj verkætlan verða gjørdar.

Tríggir starvsmenn á Havstovuni hava gjørt vart við, at teir eiga upphavsrættin til tekningarnar og verkætlanina, sum Fiskimálaráðið fekk fyri góðum trimum árum síðani. Tekningarnar og kravspesifikasjónirnar liggja við lógaruppskotinum hjá Fiskimálaráðnum um at langtíðarleiga havrannsóknarskip frá privatum felagi, sum skal byggja skipið. 

Sakførarin uppí

Sakførarin hjá teimum trimum Havstovumonnunum hevur gjørt politiska myndugleikan varugan við, at løgtingið kann ikki við lóg taka ræðisrættin ella ognarrættin frá teimum, sum eiga upphavsrættin.  Meirilutin sigur, at landið hevur higartil brúkt átta milliónir krónur til at gera kravspesifikasjónir, tekningar og detailprojekt til nýtt havrannsóknarskip. Hetta arbeiðið er gjørt gjøgnum Havstovuna.  

Men fyri at sleppa undan møguligum sakarmáli um upphavsrætt, mælir meirilutin nú landsstýrismanninum í fiskivinnumálum til at biðja um nýggja tekning og byggja annað skip enn tað, sum er í lógaruppskotinum. Landsstýrismaðurin hevur annars longu biðið Vinnunevndina broyta lógaruppskotið fyri at sleppa undan upphavsrættinum. 

Havstovan ikki nevnd

Hann mælti til seta í uppskotið, at havrannsóknarskipið skal byggjast samsvarandi krøvum hjá Havstovuni. Men meirilutin í Vinnunevndini orðar broytingina øðrvísi, so Havstovan als ikki er nevnd. Broytingaruppskotið hjá samgongumonnunum í Vinnunevndini er, at havrannsóknarskipið skal byggjast samsvarandi teimum krøvum, sum skipið skal brúkast til.