Viðgera uppskot um hjálp til fíggjarliga sperd húski

Trivnaðarnevndin hjá løgtinginum viðger eitt uppskot frá Tjóðveldi og Sjálvstýrisflokkinum um at hjálpa fíggjarliga sperdum húskjum, sum eru rakt av høgum orkuprísum.

Uppskotið leggur upp til at hækka orkuískoytið umframt inntøku- og ognarmørkini í lógini um familjuískoyti. Endamálið er bæði at veita eina styrk í ár og at laga mørkini í lógini, so tey frameftir fylgja inntøku- og prísbroytingum.

Fleiri feløg og áhugabólkar hava verið í samráð við Trivnaðarnevndina í dag, eins og tvey landsstýrisfólk.

Grímur Sundstein, formaður í Trivnaðarnevndini, vil ikki siga, um samgongan fer at taka undir við uppskotinum. Hann sigur tó, at eftir hansara vitan arbeiðir landsstýrið ikki við einum líknandi uppskoti.

Hoyr innslag í útvarpstíðindunum:

Kringvarpið hevur biðið Aksel V. Johannesen, landsstýrismann í fíggjarmálum, um viðmerking, men hann hevur ikki vent aftur upp á fyrispurningin.