Mentanarnátt: Stovnar lata dyrnar upp

Í sambandi við mentanarnáttina fríggjakvøldið, letur Landssjúkrahúsið upp dyrnar á ávísum støðum. 

Starvsfólk á Landssjúkrahúsinum fara at vísa runt á stovninum, og áhugaverdar og stuttligar søgur verða at hoyra. Hvør túrur varar ein góðan tíma.

Byrjað verður á psykiatriska økinum á Eirargarði, har stutt frágreiðing verður um menningina innan økið.  Nógvar broytingar eru gjørdar á vaskarínum, har farið er frá eldri til nýmótans ídnðartøkni.

Líkskoðan

Gingið verður oman á Landssjúkrahúsið í tunlinum undir J.C.Svabosgøtu, og vitjað verður á nýggju líkskoðanarstovuni, og har verður frágreiðing um obduktiónir.

Vitjað verður eisini í nýggja skannarumhvørvinum, og har verður greitt frá um CT-skannarar og MR-skannarar. Rundvísingin byrjar klokkan 18, 18.30 og klokkan 19, og byrjað verður á Eirargarði 16.

Eisini í Kringvarpinum 

Og Kringvarpið í Sortudíki fer eisini lata dyrnar upp fyri almenninginum fríggjakvøldið klokkan hálvgum átta. Tá ber m.a. til at síggja nýggju sjónvarpsstovuna hjá Degi og Viku, sum verður tikin í nýtslu seinni í hesi vikuni. Eisini verða fýra konsertir í Kringvarpinum við Marius, Manskórinum, Niklasi og Lenu og Gretu Svabo Bech.