Christian í Grótinum-samtakið 58 mió. kr. í avlopi

Samtakið Christian í Grótinum í Klaksvík, sum er í uppsjóvarvinnuni, hevði 58 milliónir kr. í avlopi í fjør, skrivar Norðlýsið.

Tað var 15 milliónir kr. minni enn árið fyri, men orsøkin til tað er ES-boykottið, sigur stjórin, Eyðun Rasmussen við blaðið.

Christian í Grótinum seldi fyri 333 milliónir kr. í fjør, og tað vóru 23 milliónir meir enn árið fyri.

ES-boykottið hevði við sær, at seljast mátti á marknaðum, har prísurin var lægri, flutningskostnaðurin hækkaði, og tilfeingisgjaldið hækkaði góðar 7 milliónir kr., upp í góðar 20 milliónir kr.

Í fjør vóru 105 fulltíðar ársverk í samtakinum Christian í Grótinum, skrivar Norðlýsið.