Vinnumálaráðið vónar at farið verður at leita eftir olju á Rosebank

Í Bretlandi hevur hoyring verið um eina møguliga oljuleiting á Rosebank, sum liggur tætt við føroyska markið.

Hvørki Vinnumálaráðið ella Jarðfeingi hava sent bretskum myndugleikum hoyringarsvar. 

Men Tvøroyrar kommuna og Tvøroyrar havn sendu bretum hoyringarsvar mánadagin, har mælt verður til at góðkenna oljuleiting á Rosebank, skrivar Portalurin. 

Í svarinum verður víst á, at oljuvirksemi eystan fyri Føroyar fer at kunna gera brúk av tænastum, eitt nú á Tvøroyri, sum er næsta havnin til oljuleiðirnar á Atlantsmótinum.

Jacob Vestergaard, landsstýrismaður, sigur, at einki hoyringarsvar er farið úr Vinnumálaráðnum, men føroyska støðan er, at tað eigur at verða farið undir oljuleiting á Rosebank sum skjótast, tí tað kann eisini fáa týdning fyri føroyska oljuleiting í framtíðini.

Sjórin á Jarðfeingi, Niels Christian Nolsøe, sigur, at tey hava javnan samband við bretskar myndugleikar, sum vita, hvat føroyska støðan er.

Hoyr innslag í útvarpstíðindunum: