Hert trygdareftirlit við flogførum til USA

Trygdareftirlitið er hert við flogførum, sum flúgva til USA.

Orsøkin er illgruni - reistur í amerikanskum fjølmiðlum - um at yvirgangsfelagsskapurin al Qaeda í Sýria og Yemen arbeiðir við at menna bumbur, sum trygdareftirlitið ikki er ført fyri at síggja, og sum tískil eru lættari at smugla í flogfør.

Amerikanski ráðharrin fyri innlendistrygd hevur váttað, at myndugleikarnir eru á varðhaldi, og at orsøkin til herda trygdareftirlitið eru ítøkiligar hóttanir, men fleiri viðmerkingar vildi hann ikki gera.

Nógv flogfør flúgva úr Bretlandi til USA hvønn dag. Bert í dag t.d. fara 80 flogfør vestur um Atlantshavið, og ferðafólkini hava fingið at vita, at fráferðirnar kunnu verða seinkaðar, av tí at trygdareftirlitið er neyvari.