Fimm mánaðir fyri eitt kilo

Ákæruvaldið noyðist nú at endurskoða málini um skunkplantasjur, sum ikki enn eru latin Føroya rætti.

Eystari landsrættur broytti ein dóm, sum Føroya rættur segði síðst í februar.

Ein maður, sum fekk átta mánaða fongsulsrevsing í Føroya rætti fyri at hava gjørt 2,9 kg av hashi úr skunkplantum, fekk fimm mánaðir í Landsrættinum, men bara fyri eitt kilo av hashi.

Landsrætturin brúkti ein annan máta at umrokna skunk til hash enn Føroya rættur og ákæruvaldið gjørdu. 

Hóast Landsrætturin tók tríggjar mánaðir av revsingini, halda tey hjá ákæruvaldinum, at revsingin er herd, tí fimm mánaðir fyri eitt kilo er harðari dómur enn átta mánaðir fyri næstan tríggjar ferðir so nógv hash.

Annars staðfesti Eystari landsrættur dómin hjá Føroya rætti, sum frídømdi mannin fyri at eiga 219 hampfræ. Tað er ikki prógvað, at maðurin ætlaði at brúka fræini til at planta fleiri skunkplantur.

Mamman aftur frídømd 

Ákæruvaldið vildi eisini hava mammuna hjá manninum dømda fyri medvirkan. 

Sambært ákæruritinum hjálpti kvinnan soni sínum, tí hann hevði sínar skunkplantur í húsunum hjá mammuni. 

Og hon rindaði, um ikki allan, so ein part av streyminum, sum varð brúktur til at dyrka skunkplanturnar.  

Men mamman varð frídømd bæði í Føroya rætti og í Landsrættinum. 

Eystari landsrættur hevur aðrar grundgevingar í sínum dómi enn Føroya rættur. Tí endurskoðar ákæruvaldið nú tey málini um skunkplantasjur, sum eru á veg í Føroya rætt.