Betri vónir um gott ár nú hálvárið er gjørt upp

TF Holding Samtakið væntar sær størri vinning í ár enn væntað varð, tá árið byrjaði.

Við árslok 2013 varð mett, at úrslitið eftir skatt í 2014 fór at verða 70-100 mió. kr. í avlopi.

Men góða gongdin fyrra hálvárið ger, at nú væntar samtakið millum 140 og 160 milliónir í avlopi, sigur Súni Schwartz Jacobsen, forstjóri í TF Holding Samtakinum. 

TF Holding samtakið hevði 133 mió. kr. í avlopi eftir skatt fyrra hálvárið í ár.

Hetta eru 37 milliónir krónur meira enn í fjør. 

Minnilutin tekur sítt

Tann 30.juni var eginognin hjá samtakinum 2,8 milliardir krónur. 

Tá parturin hjá minnilutaáhugamálunum verður drigin frá, er hálvársúrslitið 111 mió. kr. eftir skatt og eginognin 2,4 milliardir. Minnilutaáhugamálini eru í høvuðsheitum ognarparturin hjá Fíggjarligum støðufesti í Eik Banka. 

Í TF Holding samtakinum eru Tryggingarfelagið Føroyar, Betri pensjón og Eik Banki umframt onnur ognar- og íløgufeløg.

Kappingin um tryggingar er herd. Hálvársúrslitið hjá skaðatryggingarvirkseminum er 7,7 mió. kr. í halli eftir skatt. Tað er ikki  nøktandi, verður sagt í tíðindaskrivi. 

Nógvir miðalstórar skaðar, sum endurtrygging ikki er fyri, ávirka úrslitið skeiva vegin.