Løgmaður avhoyrdur um Eysturoyartunnilin í dag

Hevur løgmaður brotið lógina um ábyrgd landsstýrisins og stýrisskipanarlógina?

Í dag fara Hans Gammeltoft-Hansen og hansara fólk at avhoyra Kaj Leo Holm Johannesen um hansara lut í tunnilsmálinum.

Sambært arbeiðssetninginum, sum Landsstýrismálanevndin orðaði, skal kanningarstjórin kanna lutin hjá løgmanni í málinum um Eysturoyartunnilin.

Endamálið við tí er at fáa greiðu á, um løgmaður hevur givið løgtinginum skeivar ella villleiðandi upplýsingar um málið, ella um hann hevur tagt við upplýsingum, sum løgtingið átti at fingið.

Eisini vil Landsstýrismálanevndin hava at vita, um løgmaður hevur hildið sína eftirlitsskyldu, - tað er, um hann ansaði nóg væl eftir, hvat Kári P. Højgaard, landsstýrismaður í innlendismálum, gjørdi í málinum um privata Eysturoyartunnilin. 

Sambært stýrisskipanarlógini hevur løgmaður eftirlit við, at hvør einstakur landsstýrismaður situr fyri sínum málsøki á lógligan og fullgóðan hátt.

Sigmund Poulsen, advokatur, er hjáseti hjá løgmanni.