Samráðast við Turkaland um handilssáttmála

Fýra embætisfólk í Uttanríkistænastuni á Løgmansskrivstovuni og Fíggjarmálarráðnum sita í løtuni við samráðingarborðið í Turkalandi, har tingast verður við turkisku stjórnina um ein handilssáttmála. 

Hetta er onnur ferðin, at føroyingar samráðast við turkisku myndugleikarnir um handilssáttmála. 

Samskifti hevur verið við Turkaland í mong ár, og fyrsta samráðingarumfar um ein sáttmála var í Ankara í februar 2000. 

Raðfesta Turkaland høgt

Løgmansskrivstovan boðar frá, at seinastu árini hava handilsviðurskiftini við onnur lond, teirra millum Turkaland, fingið høga raðfesting í Uttanríkistænastuni, og tilgongdin at fáa í lag ein handilssáttmála við Turkalandi er komin longst.

Samráðingartoymið hevur ikki stundir at gera samrøðu við útvarpið, men sigur í telduposti, at samskiftið, ið hevur verið við turkisku myndugleikarnir higartil, bendir á, at turkiska stjórnin er fús at gera ein sáttmála við Føroyar, um partarnir semjast um treytirnar. 

-  Tað fara tingingarnar í dag og í morgin helst at vísa, sigur samráðingartoymið.

Ætlanin er, at handilssáttmálin við Turkaland skal fjøltátta marknaðarmøguleikarnar hjá føroyskum fyritøkum og bøta um møguleikarnar at gera búskapin størri. Fýra fólk í Uttanríkistænastuni og Fíggjarmálaráðnum manna samráðingartoymið í Turkalandi.