Russland setur álit sítt á Føroyar og Grønland

Fiskur úr Føroyum og Grønlandi kemur í staðin fyri fisk úr londunum, sum Russland hevur boykottað síðani 1.august. 

Tað skrivar russiska tíðindastovan Itar-Tass, sum hevur tíðindini frá tollmyndugleikunum í St. Pætursborg. 

Innflutningsforboðið hjá Russlandi er ikki galdandi fyri Føroyar og Grønland.

Ikki minni fiskur

Tollmyndugleikarnir í útnyrðingspartinum av Russlandi siga, at líka nógvar fiskavørur verða seldar har sum fyri boykottið. 

Sambært Itar-Tass hava russisku myndugleikarnir síðani 8.august havt tingingar við nógv lond, teirra millum Føroyar, um at keypa matvørur frá teimum.

Russland ætlar at innflyta matvørur, sum plagdu at koma úr ES, USA, Avstralia, Noreg og Kanada, úr øðrum londum, sum ikki eru á svartalistanum hjá russisku stjórnini.