Privatu fjølmiðlarnir komnir í fíggjarlógina

Nú er tal komið á stuðulin til privatu fjølmiðlarnir, sum Bjørn Kalsø, landsstýrismaður í mentamálum, boðaði frá á pallaborðsfundi í Havn mikudagin í síðstu viku.

Í fíggjarlógaruppskotinum fyri 2015 eru tvær milliónir krónur í miðlastuðli.

Játtanin er ætlað til at stuðla privatu fjølmiðlunum, útbreiðslu og redaktionellum arbeiði.

Men eingin stuðul verður latin fyrr enn løgtingið hevur samtykt eina lóg um stuðulin, stendur í fíggjarlógaruppskotinum.

KVF ongan góðan 

Bjørn Kalsø segði á pallborðsfundi í Havn mikukvøldið, at ætlanin at geva Kringvarpinum pengar afturfyri, at Kringvarpið gevst at senda lýsingar, er kollsigld í samgonguni.

Og tað sama er við ætlanini at lata Kringvarpinum meirvirðisgjaldið av kringvarpsgjaldinum.

Bjørn Kalsø segði bart út á pallborðsfundinum, at hann hevur mist alla vón um at fáa fjølmiðlapakkan, sum hann hevur arbeitt við í langa tíð, góðkendan í samgonguni.

Hann segði seg ikki tora at fara í løgtingið við honum, tí tað kann enda við, at støðan hjá Kringvarpinum verður verri, enn hon er nú.

Og sambært landsstýrismanninum í mentanarmálum sleppur Kringvarpið at halda fram at senda lýsingar.