Barnafrádrátturin í landsskattinum hækkar ikki

Samgonguflokkarnir í fíggjarnevndini taka ikki undir við uppskotinum frá andstøðuflokkunum um at hækka barnafrádráttin úr 6.500 krónum upp í 8.000 kr. um árið. 

Bárður Nielsen, Bill Justinussen, Jákup Mikkelsen og Rodmundur Nielsen siga, at samgongan í 2012 gjørdi stórar skattauimleggingar, og tá hækkaði barnafrádrátturin eisini 1.000 krónur. 

Landsstýrismaðurin í fíggjarmálum hevur upplýst, at arbeitt verður við at umleggja skattaskipanina. Meirilutin í fíggjarnevndini heldur, at landsstýrsmaðurin eigur at taka møguleikar broytingar í barnafrádráttinum við í hesi umlegging.

Kostar 21 mió. kr.

Minnilutin i fíggjarnevndini, Kristina Háfoss, Eyðgunn Samuelsen og Aksel V. Johannesen, mælir tinginum til at samtykkja uppskotið. 

Tey siga, at barnafamiljurnar er ein av bólkunum í samfelagnum, sum hevur tyngstu byrðarnar, tí kostnaðarstigið er so høgt. Víst verður eisini á, at frá 2009 til 2013 vóru 511 færri kvinnur í burðardyggum aldri, ella stórt sæð tað sama sum afturgongdin í fólkatalinum sama tíðarskeið.

At hækka barnafrdráttin úr 6.500 krónum upp í 8.000 krónur verður mett at kosta 21 milliónir kr.