Berghol norður um Fjall verða gjørd í 2021

Tað kostar nakað tað sama at víðka berghol sum at gera nýggj, tá eingin onnur farleið er at brúka, meðan bergholini verða víðkað. Tað eru royndirnar bæði í Noregi og Íslandi.

Nýggj berghol norður um Fjall í Borðoynni verða gjørd frá 2021 til 2024. Tey skulu ætlandi kosta 265 mió. kr. 

Til nýggju bergholini eru gjørd, verður dentur lagdur á at gera trygdina í gomlu bergholunum so góða sum gjørligt, sigur Jørgen Niclasen, landsstýrismaður, sum hevur svarað fyrispurningi frá Elsebeth Mercedis Gunnleygsdóttur, løgtingskvinnu.

Landsstýrismaðurin upplýsir í svarinum, at Landsverk í næstum fer at ráðføra seg við serfrøðingar í Sveis um, hvussu bergholini í Føroyum kunnu dagførast.

Og fyrst í 2015 fær Fíggjarmálaráðið eitt tilmæli frá Landsverki um, hvussu nógv tað kostar at dagføra berghol samanborið við at byggja nýggj berghol. Tá tilmælið er komið, verður tað lagt til politiska støðutakan, sigur Jørgen Niclasen.