Føroyskir felagsskapir fáa ikki neyðhjálp

- Tað er sera trupult hjá felagsskapum, sum virka í Føroyum, at søkja um pening, og mær er upplýst, at tað letur seg ikki gera at søkja, tá talan er um neyðhjálp/humanitera hjálp.

Tað sigur Edva Jacobsen, tingkvinna fyri Sambandsflokkinum.  Hon vil hava at vita frá Kaj Leo Holm Johannesen, løgmanni, hvussu stórur partur av peninginum, sum Føroyar lata í menningarhjálp, er latin hjálparfelagsskapum, sum virka í Føroyum, seinastu trý árini. Hon spyr eisini, hvussu nógvur peningur er latin útlendskum felagsskapum hesi árini.

Hjálp og umsiting

Edva Jacobsen vil somuleiðis hava at vita, hvussu nógvur peningur fer beinleiðis til hjálp uttanlands, og hvussu stórur partur fer til umsiting.

Edva Jacobsen sigur, at tað er harmiligt, at lógarverkið er so stirvið, at tað avmarkar føroyskar hjálparfelagsskapir at søkja. Føroyingar hava altíð verið virknir í hjálpararbeiði, og tí er tað sera týdningarmikið at møta fíggjarliga vælvild í Føroyum, sigur hon.

Løgtingið hevur samtykt, at løgmaður skal svara fyrispurninginum frá Edvu Jacobsen.