Anita sleppur ikki aftur til fiskiskap í bræði

Hóast dómur er fallin í málinum ímóti garnaskipinum, Anitu, so kann rúm tíð ganga, áðrenn skipið sleppur aftur til fiskiskap.

Kaj Leo Holm Johannesen, løgmaður boðaði 25. oktober frá, at hann tók aftur fyribils veiðuloyvið og fiskiloyvið hjá Anitu til dómur var fallin í málinum móti skipara, reiðara og reiðaríi.

Anita noyddist at gevast við fiskiskapinum 1.november. Skipið liggur nú í Spania.

Reiðaríið hevur stevnt Løgmansskrivstovuni og vil hava Føroya rætt at ógilda avgerðina hjá løgmanni.

Nær tað málið kemur fyri í rættinum, er ikki greitt.

Advokaturin hjá Løgmansskrivstovuni hevur biðið um longda freist at svara stevningi hjá reiðarínum, og hann skal svara seinast í januar.

Ikki fyrr enn tá verður greitt, nær málið kemur fyri í rættinum.